In Habargidir ay aqoonyahan ka doorato Janaraal waxay aheed farriin nabadeed oo tilmaan ka bixineysa jihada ay u socoto.

Bishii Agoosto ee sanadkan ayaan dhegeystay khudbad uu Cabdi Qeybdiid ka jeediyay shirkii Habargidir ee magaalada Hobyo. Furfurasho kadib, Cabdi Qeybdiid wuxuu sheegay in 100 sano ka hor ay Habargidir Hobyo ku shirtay si ay uga tashato aayaheeda, ayna maanta mar kale Hobyo isugu timid si ay dib ugu eegto wixii u qabsoomay, ayna u saxdo wixii ka qaldamay.

In uu shirkaani noqdo mid beeshu ka dhaxasho nabad iyo dib-u-heshiisiin ay miraheeda gurtaan jiilasha soo socdo, ayna beeshu cafis iyo heshiis weydiisataan wixii iyaga iyo beelaha kale kala gaaray ayuuna kula dardaarmay.

Qeybdiid wuxuu Habargidir ku eedeeyay in ay siyaasadda u soo dirsadaan qofka dadka ugu tuugsan, qaaqlaha ah, oo aan xoshoonin, wuxuuna kula taliyay in ay hoggaanka beesha u doortaan qof aqoon iyo karti hoggaamineed leh, ayna meel iska dhigaan dadka taariikhda uga jira baalka madoow. "Meel iska dhiga aniga iyo ragga ila midka ah ee wax soo qarribay, maanta waxaan diyaar u nahay in aan idinka fariisanno, ee ha seegina in aad doorataan qof xishooda, oo leh dhaqan suubban, diin, aqoon, iyo garasho celineysa, oo xal ka keeni kara wixii beesha dhexdeeda iyo beelaha kale soo kala gaaray. Wax badan ayaa naga soo qarribmay, taariikhduna way qormeysaa ee aan isdaba qabanno ayuuna Qeybdiid hadalka ku soo xiray.

Farriinta nabadeed ee Cabdiqeybdiid waxay leedahay miisaan gaar ah, waayo dardaaranka iyo talada ah "qorayga dhiga ee qalinka qaata" ee ka imanaysa Cabdiqeybdiid oo hoggaankii dagaallada sokeeye ka mid ahaa waxay in badan ka saameyn badan tahay farriin ka timid aqoonyahan dagaalka daawade kaliya ka ahaa.

Dardaarankii Cabdiqeybdiid Habargidir meeshii ugama tegin ee xisaabta ayay ku darsatay, oo bishii September waxaa hoggaanka beesha ku tartamay Janaraal Maxamed Nuur Galaal oo ka mid ahaa saraakiishii milateriga ee dowladdii Kacaanka iyo Prof. Cabdulqaadir Maxamed Shirwac oo iskuul iyo jaamacad Gaalkacyo ka aasaasay, gacantana ku hayay dhismaha waddada isku xirta Gaalkacyo iyo Hobyo. Prof. Shirwac ayaa wuxuu ku guuleystay 41-cod, Gen. Galaalna wuxuu helay 8-cod. In Habargidir ay aqoonyahan ka doorato Janaraal waxay aheed farriin nabadeed oo tilmaan ka bixineysa mustaqbalka iyo jihada ay beeshaasi u socoto.

Doorashadii kadib, maanta ayaa Prof. Shirwac Muqdisho lagu caleemasaaray. Khudbad uu xafladda ka jeediyay ayuuna ku sheegay in ay wafdiyo u kala direen shanta Soomaaliya, ayna oday dhaqameedyo ka kala socdo ay maanta shirkaan fadhiyaan, wuxuuna odayaashaas ka codsaday in ku biiriyaan waaya-aragnimadooda dhaqan. Wuxuu ku kaftamay in Habargidir oo colaaddii fure u aheed, ay hadda nabadda fure u noqaneyso, oo ay maaanta ku jirto baadigoob nabadeed, ayna diyaar u yihiin in ay dhexdoodu heshiiyeen, ayna la fariistaan qabiillada kale ee ay wax kala tabanayaan. “Qarnigii qalinka iyo nabadda ayaan galnay, qorigii waan dhignay, xabaddana waan ka bixinnay, oo dagaalka ayaa na baray in aan qoriga qalin ku beddelno” ayuu Prof. Shirwac maanta caleemasaarkiisa ka yiri.

Soomaalidu way ka daashay dagaal iyo colaad, waxayna u bisishahay nabad, wadanoolaasho iyo horay-u-socod, Habargidirna waxay maanta u fureysaa dariiq cusub oo ah in uu qabiil kaste soo sameysto hoggaan aqoon leh, la fariisto, lagana heshiiyo wixii dadka soo kala gaaray, kadibna Soomaali oo iskuduuban, heshiis ah, isuna caloolfayoow, ay dhisato Soomaaliya loo dhan yahay; waana sunno fiican oo mudan in Habargidir lagu bogaadiyo, loogana daysado.