Markii dal burburayo, dadkiisa waxgalka ah kama tagto ee cagta ayuu sii mariyaa!

Dhaxal faneed oo aan loo ogeyn ayuu ifka uga tegay. Tuulada Dac oo 18KM galbeed uga beegan degamada Ceelbuur ayuu ku dhashay 1948-dii, halkaas ayuuna ku soo barbaaray. Maalmihii xuriyadda ayuu soo galay magaalada Muqdisho oo uu wax ku bartay. Cilmiga luqadaha ayuu ka bartay jaamacaddii Umadda, kadibna waxa uu agaasime ku xigeen ka noqday Wakaaladdii Biyaha Soomaaliya. Intii uu socday dagaalkii 1977kii waxaa loo magacaabay guddoomiyaha gobolka Godeey, markii dagaalka laga soo laabtayna waxaa loo magacaabay xoghayaha Wasaaradda Ganacsiga, halkaas oo uu ka shaqeynayay in ku dhow 10 sano.

Waa abwaan Xaashi Yuusuf Warsame Cabdulle oo ahaa walaalka ka weyn Cabdalla Yuusuf(Hanuuniye). Sida ay Hanuuniye iyo Barre Fiidow ku xuseen wareysi uu Cumar Seerbiya uga qaaday tlifishanka Goobjoog, waxa uu Xaashi Yuusuf curiyay heeso badan oo maanta Hanuuniye loo yaqaan, oo ay ka mid yihiin "Hasha labada geel jecel" iyo "Gorgoryohow i gaarsii". Sanadkii 1982-kii wuxuu curiyay heesta "Laab dooxantay" oo ay markii hore wada qaadeen Hanuuniye iyo Nadiifo Cali Kullane, 1984-tiina uu Barre Maxamed Fiidow ku soo darsaday riwaayaddiisa "Ka joog adiga maahee" oo ay ku wada qaadeen Saafi Ducaale iyo Axmed Inshaar, dibna waxaa mar kale u qaaday Xabiibo Xasan Tooxow iyo Axmed Inshaar, iyo fannaaniin kale.

Dabayaaqadii 1987kii waxaa abwaan Xaashi Yuusuf haleelay xanuun sixir lagu sheegay oo ka naafeeyay maskaxda iyo lugta bidix. Markii ay burburtay dowladdii dhexe wuxuu safka hore ka galay dadkii dhibbanayaasha u noqday dagaalladii dhacay. Waxaa dhaawac dhanka garabka ah ka soo gaaray wiifto ka timid dagaal jabhadihii iyo dowladda Muqdisho ku dhex maray, mar kalena waxaa dhaawac culus ka soo gaaray dagaalkii 1993-dii Xamar ku dhex maray askartii Mareykanka iyo jabhaddii USC.

Bartamihii sagaashameeyadii waxaa Xaashi Yuusuf la geeyay tuuladii Dac ee uu ku dhashay, waxaana halkaas ku xannaaneyn jirtay walaashiis Xabiiibo Yuusuf Warsame.

In kaste oo uu xanuun cuuryaamiyay maskaxdiisa, marmarka qaar waa ay fiicneed xusuustiisu, wuxa uuna ka sheekeyn jiray berisamaadkiisii, in kaste oo uusan mar kaste heli jirin dad uu uga sheekeeyo maadaama ay dadka badankood u arkayeen nin waalan oo iska hadlaya.

Wuxuu si fiican u yaqaannay Ingiriiska, Faransiiska iyo Talyaaniga. Markii aan iskuulka ka soo baxno waxa aan ku soo mari jirnay balanbalo iskuulka ka sokeyso, waxa uuna na weydiin jiray ciwaannada cashirradii aan maalinkaas soo qaadannay oo uu qaarkood noo sharxi jiray, isaga ayaana ka bartay erayo badan oo Ingiriis ah, kana maqli jiray erayo Talyaani ah oo ku hadli jiray markii ay ka xanaajiyaan carruurta oo ku maadeysan jirtay.

Ka dib 39 sano oo uu carruurnimo, caafimaad, halabuur iyo madaxnimo ku soo qaatay noloshiisa iyo 27 sano oo uu xanuunsanaa, Xaashi Yuusuf waxa uu isaga oo 66 jir ah ku geeriyooday tuulada Dac 2014-kii, hal gabar ayuuna ifka uga tegay. Alle ha u naxariisto.

"Markii dal burburayo, dadkiisa waxgalka ah ee uu wax ku yahay kama tagto ee cagta ayuu sii mariyaa " Nuuraddiin Faarax