Skip to main content

Ragga iyo gabdhaha warbartay!

"Waxay aheyd gabar akhlaaq badan, aqoon leh, oo hawlkar ah. Hay'ad ayaan ka wadashaqeyn jirnay. Waxay u dallacday agaasimaha shaqada iyo shaqaalaha hay'adda ee Koofurta Soomaaliya. Xushmad iyo tixgelin badan ayaan u heynay, waxayna aheyd qof afgaaban oo aan shaqada kaliya ka wadahadalno. Malaheyga, ma jirin qof shaqaalaha ka mid ah oo ku dhiirraday in uu gabadhaas shukaansi iyo xiriir hoose la sameeyo, waxaanse ogaa rag badan oo damac ka galay, balse ku dhiirran waayay. Waayo aqoonteeda, kartideeda iyo xilka ay hay’adda ka heysay ayaan ugu waabsaneyn.

Sanado kadib ayay maalin xafiiskeeda iigu yeertay, waxayna igu casuumtay arooskeeda oo asbuuc kadib Muqdisho ka dhici doono. Waxayna ii sheegtay in ay isla aqalgelayaan mid ka mid ah waardiyaha xarunta hay'adda! Waan rumeysan waayay. Si ay iigu xaqiijiso ayayna infiito ii soo taagtay. Waa run oo magaca infiitada ku qoran waa nin aftahan ah oo ka mid ah waardiyaha. Hambalyo kadib ayaan si kaftan ah u iri: meel aanan kaa fileyn ayaad nooga soo baxday. Waxay igu tiri: saaxiibow adinka ayaa halkii aan idinka filayay ka soo bixi waayay. Waayo ma jirin hal nin oo raggiinnaan aqoonta leh ee xafiisyada ka shaqeeya ka mid ah oo gabarnimo iila sheekeystay, ee damac guur igu soo hadalqaaday. Waxaana gaaray heer aan dumarnimadeyda ka shakiyo. Balse ninkaanu waa geesi. Waa ninka kaliya ee igu soo dhiirraday. Subixii markii aan shaqada soo gelayo ayuu hadal kaftan ah igu tuuri jiray. Qalbi bini-aadam waa bataatiye kaftankiisu wuu i karay, ee saaxiib nagala soo qeybgal xafladda meherkeenna ayay igu tiri. Inta farajacay ayaan ku iri: Libaax nin aan garaneyn ayaa lax ka rito ee Eebbe ha isu kiin barakeeyo.

Intii aysan aqalgelin ayay ninkii waardiyaha ka wareejisay, waxaana laga dhigay darawalka gaariga hay'adda. Subixii ayuu guryaheenna gaariga naga soo qaadi jiray, galabkiina wuu nagu celin jiray. Iyagoo saddex carruur ah isu dhalay ayaana iigu dambeysay oo aan shaqadii ka tegay."

Ustaad Cabdalla Xoosh aayaa dhacdadaan iiga sheekeeyay.

Ragga waxbartay badankood kuma dhiirradaan gabdhaha waxbartay, ee shaqooyinka fiican magaalada ka heysta. Qaarkood waxay ka cabsanayaan in hadal ka tago, oo waxay malaynayaan in ay gabdhahu meeleysan tahay. Qaar saaxiibbo hoose ayay la yihiin oo shukaansi iyo guur isuguma yimaadaan. Qaar kalena waxay aaminsan yihiin in aysan dhaqi karin gabar waxbaratay.

Waa run oo libaax nin aan aqoonin ayaa lax ka rito. Haddii ay ragga waxbartay ka gambadaan gabdhaha jinkooda ah, waxay u badan tahay in uu ku dhiirran doono nin aan aqoonteeda iyo shaqadeeda wax badan ka ogeyn, oo aaminsan: budo qabe iyo biyo waa isu baahan yihiin.

Intii uu uurku buki lahaa afku haku buko, ee shab dheh oo tijaabi nasiibkaada xitaa haddii ay PhD wadato



Comments

Post a Comment

Fadlan wixii faallo ah halkaan iigu reeb. Mahadsanid.

Popular posts from this blog

Safarkii aan ku soo maray caalamka iyo waxyaabihii cajiibka ahaa ee aan ku soo arkay!

Nin aan dhul marin dhaayo ma laha e, balwaddeydu waa safarka iyo dalxiiska. Sidii Ibnu-Baduudah ayaan ku soo wareegay shanta qaaradood ee caalamka. Waxaan tegay magaalooyinka dunida ugu caansan, waxaana la soo noolaaday xadaaradaha kala duwan ee bulshooyinka caalamka, waana sababta igu riixeysa in aan qormadaan kugula wadaago waxyaabihii iigu cajiibsanaa ee aan soo arkay. Waxaan ka duulay Muqdisho, waxaana tegay magaalada Kigaali ee dalka Rwanda. Markii aad eegto horumarka iyo muuqaalka Kigaali, caqligaadu wuu diidayaa in ay labaatan sano ka hor ku jireen dagaalla-sokeeye, ayna saddex bil gudahood isaga dileen dad ku dhow hal milyan. Rwanda waxay tusaale nool u tahay in uu dal walba ka soo kaban karo dhibaato kaste, haddii uu helo hoggaan fiican. Waxaan booqday magaalada Al-Aqsar(Luxor) ee dalka Masar oo aheed caasimaddii Boqortooyadii Fircooniga. Magaalada waxaa weli ku dambeeya raadkii Fircooniyiinta, oo ku xusuusinaya Fircoon oo Rabbinimo sheeganaya, Nabi Muuse oo uga digaya, i...
26 comments
Read more

Banka Carafo

Waa duhur Sabti ah oo ay cadceeddu Carafo dul taagan tahay. Xujeey ka badan hal milyan iyo bar ayaa maanta taagan banka Carafo, oo 23KM dhanka bari uga beegan magaalada barakeysan ee Makka. Saakay ayay halkan u soo jarmaadeen. Daafadaha dunida ayay ka kala yimideen, si ay u gutaan tiirka 5ᵃᵃᵈ ee Arkaanta Islaamka ee Xajka. Waayeel uu sanadkan xajku ugu horreeyo oo sidaas riyadiisii ugu rumowday ayaa ku badan. Fursad dahabi ah oo marla'arag ah ayay maanta haystaan. Farxad ay la wada ilmaynayaan ayaana laga dheehan karaa wajiyadooda. Daqiiqado ka hor yay ka soo gaddoomeen Masjidka Carafo ee Namirah oo uu Sheekh Maahir Al-Muciiqili ugu jeediyay khudbada, oo loogu tarjumayay 20 luqadood, kuna tujiyay salaadaha duhurka iyo casirka oo ay soo gaabiyeen. Alle deeqsi ah oo naxariis iyo dambidhaaf badan ayay marti iyo magan u yihiin. Gacmaha ayay kor u wada taagayaan. Waji iyo qalbi khushuucsan ayay Alle ku baryayaan. Ruuxdooda iyo qalbiyadooda ayaa duceynaya inta uusan afkoodu duceynin. Wax...
Post a Comment
Read more

Halgan Miradhalay!

Waxaan ku dhashay kuna soo barbaaray magaalada Dhuusamarreeb. Waxaan ka dhashay qoys danyar ah. Anigoo 10 jir ah ayaan soo galay Muqdisho, si aan u kaalmeeyo hooyadey oo agoonnimo nagu korinaysay. Waxaan shaqo ka billaabay in aan baabuurta dhaqo. Waxaa ii xigtay in aan darawal ka noqday gaari bas ah, oo aan taksiile uga sii dallacay. Kaddibna waxaan darawal u noqday maareeyihii Warshaddii Sifeynta Batroolka.  Horraantii 1990kii ayaan go'aansaday in aan dalka ka baxo oo aan Yurub u baadigoobo nolol fiican. Waxaan tikit u jartay magaalada Moscow ee dalka Ruushka, oo aan Finland uga sii tallaabayay. Lacag oo dhan waxaan haystay intii aan tikitka ku jartay. Waxaana $50 ku iibiyay sariirtii aan ku jiifan jiray, si aan jiscin uga sii dhigto.  Waxaan ka degay Moskow oo uu qabow daran ka jiray. Dhallinyaro muqallasiin ah ayaan la kulmay. Waxaan u sheegay reerka aan ahay, waxaana ka codsaday in ay dadkeyga igu raadiyaan. Labo nin ayay ii geeyeen. Si qurux badan ayay ii soo dhoweeyeen. ...
1 comment
Read more