Skip to main content

Farmaajo ma sidii aan moodnay, ma sida uu noqday, mise sida aan loo noqon doonin!

Dec 2016 ayuu Farmaajo dib ugu soo laabtay Muqdisho oo ay ugu dambeysay markii looga guuleystay doorashadii Sept 2012. Maalinkii uu Muqdisho ka soo degay isagoo musharrax ah waxaa ilaalinayay ciidan dowladeed oo gantaallo ku hubeysan. Shacab ayaa soo dhoweeyay, mana jirin cid carqaladaysay. Bil kadibna Madaxweyne ayaa loo doortay. Habeenkii la doortay waxaa garbihiisa istaagay oo guushiisa bogaadiyay labadii Madaxweyne ee ka horreysay, Xasan Shiikh iyo Shiikh Shariif.

Xasan Shiikh oo habeenkaas hadlay wuxuu si niyad ah ugu hambalyeeyay Madaxweyne Farmaajo. Wuu u duceeyay, wuxuuna Soomaalida iyo Beesha Caalamkaba ugu baaqay in ay garab-istaagaan. Shacabkuna taageeradiisa uma kala harin oo waxaa habeenkaas Muqdisho iyo gobollada kaleba ka dhacay bannaanbaxyo farxadeed oo lagu soo dhoweynayo Madaxweyne Farmaajo, oo aan malaynayo in aysan cid kale heli doonin.

La mood, noqose wayday. Farmaajo wuxuu dowladnimadii curdarka aheyd kula orday jid qardajeex ah oo qodxo badan. Dal iyo dad midna uma turin. Wuxuu Itoobiya u dhiibay muwaadin Soomaali ah. Siyaasi mucaarad ah ayuu hoygiisa ku weeraray. Wuxuu si sharcidarro ah u riday Guddoomiyihii Baarlamaanka iyo Raysulwasaarihiisii. Wuxuu weeraray labadii Madaxweyne ee isaga ka horreysay. Wuxuuna u diiday in ay garoonka ka safraan. Wuxuu rasaaseeyay musharrixiin iyo shacab boorar wata oo bannaanbaxaya. Shalayna wuxuu mar kale guyahooda ku weeraray Madaxweyne xasan Shiikh iyo Cabdiraxmaan Cabdishakuur.

Doorashooyin uu dhiig ku daatay ayuu ka hirgeliyay Galmudug iyo Koofur-galbeed. Wuxuu cunaqabateyn saaray Jubbaland. Wuxuu cuuryaamiyay maamulkii Hirshabeelle, oo wuxuu u dooray Madaxweyne aysan heshiis ku aheyn. Waa sababta aan weli loo caleemasaarin Cali Guudlaawe oo lix bil dooran oo aan tegi karin Beledweyne, gobolka Hiiraanna ay jabhad qabiil uga aasaasantay.

Halka uu Farmaajo u socday waxay aheyd in uu kursiga xoog ku sii haysto, uuna la dagaalo cid kasta oo damiciisa diiddan. Taasina waxay sababtay in aan maanta la is aaminin oo ay Muqdisho hub kala soo degaan Madaxweyne Deni iyo Axmed Madoobe oo Xalane soo dhaafi waayay. In 10 sano kadib ay Beesha Caalamku soo magacaawdo ergay kala dhexdhexaadiya Soomaaliya. Iyo in dagaal ka qarxay Muqdisho oo ay maanta kala xiran tahay, waxaana dhufeyso isugu jira ciidankii dowladda ee halka furin ku wada jiray markii Farmaajo la doortay. 

Ololihii Farmaajo waxaa hal-ku-dhig u ahaa: danta dalka iyo dadka. Balse dalka iyo dadkuba waxay maanta ku jiraan qalqal amni iyo qalalaaso siyaasadeed. Dad badan oo guushiisa bannaanbax-farxadeed ku soo dhoweeyay ayaa shalay guryahoodii ka qaxay, qaar kalena waxay caawa ku seexanayaan cabsi iyo dhiillo coladeed.

Farmaajo ma sidii aan moodnay, ma sida uu noqday, mise sida aan loo noqon doonin. Madaxweyne danta dalka iyo dadka ka shaqeyn doona ayaan moodnay. Balse waa nooga sii daray oo nin aan xilkas aheyn oo dalkii iyo dadkiiba qalqal amni iyo qalalaaso siyaasadeed galiyay ayuu noqday. Waxaanse loo noqon doonin in mar kale lagu sirmo.



Comments

Post a Comment

Fadlan wixii faallo ah halkaan iigu reeb. Mahadsanid.

Popular posts from this blog

Safarkii aan ku soo maray caalamka iyo waxyaabihii cajiibka ahaa ee aan ku soo arkay!

Nin aan dhul marin dhaayo ma laha e, balwaddeydu waa safarka iyo dalxiiska. Sidii Ibnu-Baduudah ayaan ku soo wareegay shanta qaaradood ee caalamka. Waxaan tegay magaalooyinka dunida ugu caansan, waxaana la soo noolaaday xadaaradaha kala duwan ee bulshooyinka caalamka, waana sababta igu riixeysa in aan qormadaan kugula wadaago waxyaabihii iigu cajiibsanaa ee aan soo arkay. Waxaan ka duulay Muqdisho, waxaana tegay magaalada Kigaali ee dalka Rwanda. Markii aad eegto horumarka iyo muuqaalka Kigaali, caqligaadu wuu diidayaa in ay labaatan sano ka hor ku jireen dagaalla-sokeeye, ayna saddex bil gudahood isaga dileen dad ku dhow hal milyan. Rwanda waxay tusaale nool u tahay in uu dal walba ka soo kaban karo dhibaato kaste, haddii uu helo hoggaan fiican. Waxaan booqday magaalada Al-Aqsar(Luxor) ee dalka Masar oo aheed caasimaddii Boqortooyadii Fircooniga. Magaalada waxaa weli ku dambeeya raadkii Fircooniyiinta, oo ku xusuusinaya Fircoon oo Rabbinimo sheeganaya, Nabi Muuse oo uga digaya, i...
26 comments
Read more

Banka Carafo

Waa duhur Sabti ah oo ay cadceeddu Carafo dul taagan tahay. Xujeey ka badan hal milyan iyo bar ayaa maanta taagan banka Carafo, oo 23KM dhanka bari uga beegan magaalada barakeysan ee Makka. Saakay ayay halkan u soo jarmaadeen. Daafadaha dunida ayay ka kala yimideen, si ay u gutaan tiirka 5ᵃᵃᵈ ee Arkaanta Islaamka ee Xajka. Waayeel uu sanadkan xajku ugu horreeyo oo sidaas riyadiisii ugu rumowday ayaa ku badan. Fursad dahabi ah oo marla'arag ah ayay maanta haystaan. Farxad ay la wada ilmaynayaan ayaana laga dheehan karaa wajiyadooda. Daqiiqado ka hor yay ka soo gaddoomeen Masjidka Carafo ee Namirah oo uu Sheekh Maahir Al-Muciiqili ugu jeediyay khudbada, oo loogu tarjumayay 20 luqadood, kuna tujiyay salaadaha duhurka iyo casirka oo ay soo gaabiyeen. Alle deeqsi ah oo naxariis iyo dambidhaaf badan ayay marti iyo magan u yihiin. Gacmaha ayay kor u wada taagayaan. Waji iyo qalbi khushuucsan ayay Alle ku baryayaan. Ruuxdooda iyo qalbiyadooda ayaa duceynaya inta uusan afkoodu duceynin. Wax...
Post a Comment
Read more

Halgan Miradhalay!

Waxaan ku dhashay kuna soo barbaaray magaalada Dhuusamarreeb. Waxaan ka dhashay qoys danyar ah. Anigoo 10 jir ah ayaan soo galay Muqdisho, si aan u kaalmeeyo hooyadey oo agoonnimo nagu korinaysay. Waxaan shaqo ka billaabay in aan baabuurta dhaqo. Waxaa ii xigtay in aan darawal ka noqday gaari bas ah, oo aan taksiile uga sii dallacay. Kaddibna waxaan darawal u noqday maareeyihii Warshaddii Sifeynta Batroolka.  Horraantii 1990kii ayaan go'aansaday in aan dalka ka baxo oo aan Yurub u baadigoobo nolol fiican. Waxaan tikit u jartay magaalada Moscow ee dalka Ruushka, oo aan Finland uga sii tallaabayay. Lacag oo dhan waxaan haystay intii aan tikitka ku jartay. Waxaana $50 ku iibiyay sariirtii aan ku jiifan jiray, si aan jiscin uga sii dhigto.  Waxaan ka degay Moskow oo uu qabow daran ka jiray. Dhallinyaro muqallasiin ah ayaan la kulmay. Waxaan u sheegay reerka aan ahay, waxaana ka codsaday in ay dadkeyga igu raadiyaan. Labo nin ayay ii geeyeen. Si qurux badan ayay ii soo dhoweeyeen. ...
1 comment
Read more