Muqdisho nabad ayay rabtaa ee yaan dagaal loogu booteyn!

Maalin Khamiis ah oo ku beegan 14 sano kahor maanta oo kale(April 19, 2007) waxaa Muqdisho ka billaawday dagaalkii sagaalka maalmood, ee ay shacabka Muqdisho la galeen ciidankii Itoobiya. Waxaa lagu sheegaa dagaalkii ugu cuslaa ee abid Muqdisho ka dhacay. Laamiyada Muqdisho ayaa lagu gubay, laguna jiijiiday maydadkii Itoobiyaanka, maalmo kadibna wargeys ka soo baxa Yaman ayaa qoray in 89 askari oo Itoobiyaan ah oo ka soo baxsatay dagaalka Muqdisho ay tahriib ku galeen dalka Yaman.

Shacabku waxay ka kaceen xadgudubyadii ay u gaysanaysay Itoobiya, dagaalkuna uma aheyn xalka koobaad ee waxay doorteen markii ay dhanka Itoobiya ka fashilmeen heshiisyo ay la galeen odayaashii dhaqanka. Reer Muqdisho waxay u dhiirradeen in ay AK47 la hortagaan cadaw taangiyo ku hubaysan, waxaana halgangooda hal-ku-dhig u ahaa: geeri ama gobannimo.

Sagaalkii maalmood kadib, Guddoomiyihii Maxkamadaha, Sh. Shariif Sh. Axmed ayaa sheegay in ay bedeleen kaartadii dagaalka, waxayna qaateen taatiko guuleysatay oo ku-dhifo-oo-ka-dhaqaaq ah.

Dagaalkii Itoobiya looma kala harin oo qof kasta wuxuu ku biiriyay wixii uu heli karay. Dhalinyaro ayaa furinta hore ka dagaallamaysay, haween ayaa halgamayaasha baad iyo biyo la daba taagnaa, dhakhaatiirtu waxay la daba joogeen cirbado dhiigjoojin ah, ganacsatadu hiil iyo hoo ayay la garabtaagneyd, qurbajoogta Muqdishana waxay baal dahab ah ka galeen halgankaas guuleystay. 

Markaas ay Itoobiya xasuuqayso shacabka Muqdisho waxaa iyada la safnaa siyaasiyiin reer Muqdisho ah oo ku diganayay shacabka. Itoobiya waxaa soo horkacay oo difaac u ahaa Cali Maxamed Geeddi. Wasiir-ku-xigeenkii Gaashaandhigga, Salaad Cali Jeelle wuxuu dagaalka ku tilmaamay mid qabiil. Wasiirkii Arrimaha Gudaha, Gacmadheere, wuxuu taageeray madaafiicdii ay Itoobiya ku garaacaysay Muqdisho. Gacmadheere wuxuu dadkii qaxay ku tilmaamay dalxiisayaal, wuxuuna joojiyay gargaar ay WFP gaarsiin laheyd barakacayaasha. Guddoomiyihii Gobolka Banaadir, Maxamed Dheere wuxuu isaguna shacabkii barakacay ku tilmaamay argagixiso. Waxaana la xiray idaacadihii Horn Afrik, Shabeelle iyo IQK oo ahaa isgaarsiintii iyo ilihii ay wararka ka helayeen reer Muqdisho.

Noloshu uma joogsan xasuuqii Itoobiya, oo Iskuullo iyo jaamacado jiingad ah oo duleedka Muqdisho laga dhisay ayaa wax lagu baranayay. Waxaana xusuustaa arday aan isku fasal aheyn oo aan maalinkii iskuulka isla dhiganaynay, habeenkiina la dagaallamaysay Itoobiyaanka. Dhalinyaradaas qaarkood waxay maanta ku nool yihiin Muqdisho, waxayna harsanayaan hooska halgankii ay shalay naftooda u soo hureen. 

Itoobiya shacabka iyo ciidduba waa la colloobeen. Halgan iyo jihaad dheer kadibna lafaheeda ayay Muqdisho kala carartay. Reer Muqdishana subaxaas ayay farxad kula soo firxadeen guryahoodii. Maalinkaas waxay shacabka Muqdisho u aheyd maalin ciid ah oo ku suntan halgan guuleystay. 

Waxaan arkay wiilal farriin isku mid ah loo soo dhiibay oo dhahaya "Reer Muqdishow kala doorta Farmaajo iyo burbur" Dadkaas jawaabtii ugu fiicneyd waxaa siiyay Senator Dhegdheer oo ku yiri "Waxaan maqlaayay saraha Xamar ayaa la jajabihaa. Sarahaanu sharaf iyo gobonnimo ayay ku dhisan yihiin, ee kuma dhisna waa ku gumaysanaa ama sarahaan kaa dumihaa"

Muqdisho baryo kuma dhismin ee halgan iyo dagaal ayay ku noqotay sida ay maanta tahay. Diktaytar uma dulqaadanayso, oo barqo cad ayay dowlad la'aan ka dooratay, gumeysina xasuuq ayay ka dooratay. 

Muqdisho nabad iyo xasillooni ayay rabtaa ee yaan dagaal iyo burburin loogu booteyn. Xamar xeer iyo xeelad mooyee, xoog iyo xabbad laguma joogi karo. Mana jiro qof caano ka cabaya haddii dagaal ka dhaco, ee dowladdu yeysan hurdada ka kicin fidno hurdeysa.