Ma maqli jirtay Ciyaal Faa Cali?

Ma maqli jirtay Ciyaal Faa Cali? Waa Xuseen Sabriye oo la sawiran Cabduqaadir Salxa oo ay dhashay maamo Faadumo Cali Gacal oo ku magacdheer Maamo Faa Cali. Cabduqaadir oo aan maanta ku kulannay Madasha Aragtiwadaagga ee machadka Heritage oo ka dhacaysa Guriga Ummadda ee magaalada Jabuuti ayaa iiga sheekeeyay sida uu ku baxay magaca Ciyaal Faa Cali. Wuxuu yiri:

“Waxaan ku dhashay xaafadda Siigaale ee degmada Hodan. Hooyadey Faay Cali Gacal waxay rooti ku iibin jirtay iridka iskuulkii Dugsi sare Banaadir. Aabbaheyna wuxuu xaafaddaas ka ahaa macallin dugsi. Sanadkii 1978dii ayuu Macallin Nuur naga iibsaday gurigii aan Siigaale ku laheyn, si Mowlaca loogu ballaariyo.

Lacagtii aan ka helnay booskaas waxaan boos uga iibsannay, ugana dhisannay xaafadda Madiina oo markaas cusbeyd. Intii ka soo hartayna dukaan ayay hooyo xaafadda uga furatay. Dukaankii waa kalakacay, wuxuuna yeeshay gaari xaajiyad khamsiin ah oo suuqa looga soo adeego. Hooyo waxay sidoo kale xaafadda ka furtay biibito, labadaanyo iyo harqaan. 

Gurigeennu wuxuu barkulan u noqday ciyaalka xaafadda. Hooyo waxay dhaqaaleyn jirtay kuwa danyarta ah. Habeenkiina jardiinka guriga ayaan ku sheekeysan jirnay. Sababtaas ayayna ciyaalkii xaafaddu u qaateen magaca Ciyaal Faa Cali, oo haddii ay weero iyo dagaal gelayaan, waxay ku gelayeen magaca Ciyaal Faa Cali. 

Waxay noqdeen ciyaal isku xiran oo shiddo badan oo caan ka ah xaafadaha Muqdisho. Fowdadoodun waxay gaartay heer ay dowladdu soo farageliso, oo ay xirxirto. Aniga ilaa 6 jeer ayaa guriga la iga xiray. Hooyadey waa dhibsan jirtay in magaceeda dhib lagu soo xusuusto, oo ciyaal magaceeda wato ay dadka dhibaan, balse wax badan kama aysan beddeli karin oo ciyaalka xaafadda ayaa magacaas qaatay. Hadda hooyadey Faay Cali iyadoo waayeel ah oo caafimaad qabto ayay ku nooshahay xaafadda Madiina.”