Xafladdii ugu cajiibsaneed ee aan xaadiray!

Markii iigu horreysay muuqiisa, 2017kii ayaan ka daawaday telefishanka Goobjoog oo uu marti ugu ahaa barnaamijka Murti iyo Maaweelo oo uu ku wareystay Cumar Seerbiya. Suugaan miisaan culus ayuu barnaamijka ka jeediyay. Maalmo kadib waxaa casuuntay xarunta Ifiye oo uu ku soo bandhigay halabuurkiisa suugaaneed iyo buug uu qoray. Waxaa ii xigtay heestiisa Difaac iyo Dagaal oo uu ka duubay telefishanka Muqdisho Cable oo ay gaari ku dhex qaadayaan ay carruur yaryar.

Dadnimo iyo dabeecad dahabi ah ayaan ku bartay maaalmo aan 2018kii marti ugu ahaa magaalada Boorama oo uu waxbarasho u joogay, waxaana xusuusteyda ka go'in sidii uu iigu ahaa dhaqtar aan shahaado heysan iyo walaal aan hooyadey dhalin mar aan Boorame ku xanuunsaday oo aan goob ku wada nooleyn.

Safar waxbarasho oo uu u maray halgan adag iyo dariiq aan ubax ku goglaneyn ayaa bil kahor u soo idlaaday, saddex maalin kahor ayuuna Muqdisho dib ugu soo laabtay. Saaxiibbo ka warhelay socdaalkiisa oo aan horay ugu helin fursad ay ku dhiirrigeliyaan halabuurkiisa ayaa u qorsheeyay in ay xalay u dhigaan xaflad kadis oo ay ku bogaadinayaan hibadiisa suugaaneed iyo halgankiisa waxbarasho ee guuleystay.

Fardowsa Xuseen Cali oo ka mid ah asxaabtiisa ayaa shalay ku ballamisay in ay bareyso saaxiibkeed oo ay isguursan rabaan. Hool mugdi ah oo ay saaxiibbadiis ku jiraan ayay soo gelisay. Sacab ayaa lagu soo dhoweeyay, waxaana ku xigay cod hambalyo ah oo shalay laga soo duubay hooyadiis Jamaad oo ku nool magaalada Beledweyne oo uu ku soo barbaaray. Ilbiriqsiyo ka mid ah heesta "Hooyadey Jamaadey" oo uu isagu horay ugu sameeyay hooyadiis Jamaad ayaa lagu furay, waxaana ku sii xigay hambalyadii hooyadiis. 

Miraha hooyannimada ka hadlaya ee heestiisa iyo codka hooyo Jamaad laga soo duubay oo qalbitaabad ahaa ayaa dareenkeennii bedelay. Nalkii ayaa la shiday, waxayna isheydu qabatay rag badan oo ilmeynaya. Malaha waligey ma arag rag tiradaas dhan oo halmar wada oynaya!

Xafladdii tahniyaddu aheed tacsi ayay u ekaatay. Qaar asxaabta ka mid ah ayaa hadlay, codad hambalyo ah oo horay looga soo duubay saaxiibbadiis dalka ka maqan ayaa la shiday, waxaana saacad ka badan nagu qaadatay in aan dareenkii farxadeed dib ugu soo laabanno.

Dhadhanka saaxiibtinnimada iyo sida ay saaxiibbadu u yihiin hanti maguurto ah; sida ay mararka qaar qofka ugu adkaaneyso in uu maareeyo dareenkiisa iyo sida ay farxaddu waqtiyada qaar u gashato dharka murugada ayaa indhaha asxaabta iiga wada muuqatay.

Ibraahim Cusmaan Afrax(Ibraahim Nolosha), saaxiib waxaan kuugu hambalyeynayaa halabuurkaada, guusha aad ka soo hoysay waxbarashadii aad halganka adag u soo gashay iyo in aad leedahay saaxiibbo ku jecel oo goor kasta ku garabtaagan. Guuleyso Ibraahim adduun iyo aakhiraba, saaxiib.