Ixtiraam caseeyaha

Annagoo jaamacad dhiganeyna ayaan bareeg u soo baxnay. Mid ardayda ka mid ah ayaa kabaha u dhiibtay wiil caseeye ah oo bannaanka fadhiyay. Wuxuu xirtay kabihii caseeyaha, wuxuuna ku yiri: fasalka iigu keen markii aad ii caseyso. Fasalka oo dabaq ku yaallay ayaan galnay, waxyar kadibna waxaa noo soo galay caseeyihii oo cagacaddeynaya oo gacanta kabihii ku wado oo raadinaya ardaygii kabaha u soo dhiibtay. Wuu siiyay, kabihiisa ayuu ka qaatay, wuuna naga baxay.

Ustaad Naasir Haji oo fasalka noogu jiray ayaa nagu yiri: Ilaahey ka baqa oo cunuggaas miskiinka ah haku addoonsanina labada kun ee aad siineysaan, oo haku qasbinina in uu kabihiinna idinku soo raadiyo markii uu caseeyo. Wuxuu ka mid ahaa cashirradii ugu qaalisanaa ee aan jaamacadda ku soo dhigtay. 

Ganacsiga in wax lagaa iibiyo waa lacag, in meesha aad joogto laguu keenana waa lacag dheeri ah. Haddii aad caseeyaha ka dabato in uu kabaha kuu dhaqo ama uu meeshaada kuugu keeno, waa gobannimo in aad lacag dheeri ah ugu darto oo aad shaqadiisa ku dhiirrigeliso.

Caseeyayaal ayaan la sheekeystay. Badankood waxay qoysaskooda ugu jiraan kaalintii aabbe, oo waxay reerka ku biilaan shilimaadka ay shaqadaas ka helaan.

Waxaad arkeysaa dad la gorgortamaya oo ka dalbanaya in iyaga oo labo qof uu saddex kun kabaha ugu caseeyo. Kunkaas shilin ee aad ka reebatay adiga waxba kaama dhibayo, caseeyahana wax weyn ayuu u galaa, oo biil iyo nolol ayuu u yahay. 

Subixii ilaa galabkii waxay u taagan yihiin in ay dadka kabaha u caseeyaan si ay quutulyoomka qoysaskooda u helaan. Waxay naga mudan yihiin tixgelin, naxariis, kaalmeyn, hadal debacsan, iyo in aan ku ixtiraamno, kuna dhiirrigelinno shaqadooda oo aan labada kun ee caseeyaha ah ugu darno wixii kale oo aan u heli karno. Aana uga mahadcelinno shaqada ay noo qabteen markii ay noo adeegaan.