“Waaagii madaafiicda lagu garaacayay xaafadaha Muqdisho ayaa madfac Fooriye ah ku soo dhacay iridka jaamacadda anigoo ilaalinaya arday imtixaan ku jirtay. Waan kala cararnay, arday kastana warqaddii imtixaanka ayuu la booday. Waxaan galnay dhisme shub ah oo jaamacadda ku dhex yaallay. Intii aan meesha ku jirnay waxaa dhegteyda ku dhacay arday meesha nagula jiray oo arday kale ku dhahaya: hebelow su’aal heblaayo maxaad ka dhigtay?!
Xoogaa kadib waxaa noo soo galay muqaawamadii. Markii ay arkeen in ay tahay goob waxbarasho ayay nagu dhaheen: ka carara meesha oo guryihiinna kala aada. Waan kala tagnay. Saacad kadib ayaa waxaa i soo wacay mid ardaydii ka mid ah, wuxuuna igu yiri: ustaadow Kaaraan ayaan joogaa, warqaddii imtixaanka oo aan la cararay ayaana wataa ee halkee kuugu keenaa?!
Dhacdadaan oo uu iiga sheekeeyay ustaad Mahamud Jimale waxay tusaale nool u tahay duruufihii ay macallimiinteenna ku soo shaqeeyeen iyo halgankii ay ardaydeennu wax ku soo barteen. Macallimiinteennu waxay iftiin rajo ah bulshadeenna uga dhex ifiyeen qol mugdi ah xilli ay adkeen in waxbarasho lagu riyoodo.
Xaaladihii kala duwanaa ee dalku soo maray waxay suurageliyeen in aysan waxbarashadu joogsan. Naftooda ayay u hureen. Macallimiin badan ayaa lagu dhex toogtay dugsiyo Quraan iyo fasallo ay carruurteenna wax ku barayeen. Qaar kalena waxay silac badan kala kulmeen in ay gaaraan ama ka soo laabtaan xaruntii waxbarasho ee ay ka hawlgelayeen.
Maanta kaliya ma aha maalinka macallimiinta Soomaaliyeed ee maalin kasta waa maalinkoodii. Maalin kasta ayay carruurteenna wax ku baraan halgan iyo nafhur. Waxayna naga mudan yihiin bogaadin, mahadcelin iyo in aan xiriirinno oo aan ka warqabno noloshooda iyo duruufahooda. Intii dhimatay Eebbe ha u naxariisto, inta noolna cimriga Alle ha u barakeeyo.
Waa qormo xaqiiqada tabanayso . Waxay cadaynasaa biseelka ay ardaydeenu u qabaan aqoon ta iyo dadaalka ababaiyaasha . Mahadsanidiin cidkastaa oo xaraf noo xariiqday.
ReplyDelete