Digsiga karka kuleyl ayaa ka keenay!

Waxaan daawaday wareysi uu wariye Ayaanle Xuseen Cabdi todobaadkii hore ka qaaday Dr. Daahir Mire Jibriil, oo uu uga sheekeeyay dhacdo xanuun badan oo noloshiisa bedeshay. Sida uu sheegay; sanadku waa 1978, Daahir Mire waa arday 22 jir ah oo dhigta kulyaddii Lafoole. Siyaasadda iyo xaaladda dalka waxba kalama socdo, wuxuuna kubadda Kolayga u ciyaaraa kooxdii Lafoole.

Oktoobar 1978 waxaa toogasho lagu xukumay saraakiishii ka dambaysay inqilaabkii dhicisoobay. Sargaal kasta waxaa la faray in uu u yeerto hal qof oo ehelkiisa ka mid ah, si uu ula dardaarmo. Saraakiishaas waxaa ka mid ahaa Cabdiraxmaan Macallin Bashiir oo uu dhalay Daahir Mire Jibriil abtigiis, sidoo kalena ahaa saaxiib ay isla soo koreen. 

Cabdiraxmaan wuxuu codsaday in loo keeno saaxiibkiis Daahir Mire. Galab ayaa Daahir laga soo qaaday Lafoole, waxaana la geeyay xabsigii Biyamuundo ee degmada Xamarjajab.

"Qol cidlo ah ayay i geeyeen. Askari ayaana gadaashayda taagan. Waxaa ii soo galay Cabdiraxmaan Macallin Bashiir oo garan iyo macawiis xiran. Horteyda ayuu soo istaagay. Garankii ayuu kor u qaaday. Labada naas waa laga gooyay oo carun ayaa ka da’ayay. Xuddunta agteeda duleel weyn ayaa uga yaallay oo muruq caloosha ah ayaa go'naa, waxaadna moodaysaa in uu bahal ka qaniinay. Macawiistiisa ayuu kor u qaaday. Lugtiisa muruq ayaa ka go’naa. Gacmihiisuna way gariirayeen. Farihiisa ayuu i tusay, oo cidiyaha gacmaha iyo lugaha oo dhan way ka baxsan yihiin, oo carun ayaa ka dareerayay. 

Cabduraxmaan oo indhihiisa ilmadu ka dareerayso ayuu igu yiri "Waxaan kuugu yeeray in aad aragto waxa la igu sameeyay! Labo beri kadibna waa nala tooganayaa!" Kadibna isagoo aan hadal kale i dhihin ayuu iga dhaqaaqay. Aniga miirkii ayaa iga tegay. Maalinkii labaad ayaana soo miirsaday anigoo Lafoole joogo, labo maalin kadibna waa la toogtay saaxiibkey Cabdiraxmaan."

Sida uu wariyay, Cabdiraxmaan wuxuu ka seexan waayay sawirkii uu arkay iyo hadalkii uu Cabdiraxmaan ku yiri, wuxuuna go'aansaday in uu jabhadeeyo. Sababtaas ayuu dalka uga cararay, wuxuuna isagoo 23 jir ah ka mid noqday hoggaankii SSDF oo uu ka noqday masuulka ugu da'da yar. Halgan dheer kadib waxay qabsadeen Puntland, wuxuuna ka mid noqday aasaaska maamulka Puntland. 

Kadib, ayuu Daahir Mire Jibriil wuxuu waxbarashadii ay jabhadnimadu ka kala goysay ka sii watay Mareykanka, wuxuuna Bachelor, Master iyo PhD ka qaatay jaamacadda California oo uu ka bartay xallinta khilaafaadka.

Wareysi uu June 2020 siiyay Saab TV ayuu Dr. Daahir Mire Jibriil oo ilmayana ku sheegay in uu mar kasta ku qarwo muuqaalkii walaalkiis iyo saaxiibkiis Cabdiraxmaan Macallin Bashiir, iyo hadalkiisii ahaa "Waxaan kuugu yeeray in aad aragto waxa la igu sameeyay. Labo beri kadibna waa nala tooganayaa!"

Waa hal dhacdo oo tusaale u ah tacaddiyadii uu Kacaanku ku kacay, ee sababay in ay shacabku kacaan. Digsiga karka kuleyl ayaa ka keenay. Daahir isagoo arday ah oo aan siyaasad shaqo ku laheyn ayuu arkay dulmigaas oo ku qasbay in uu duurka ku jabhadeeyo. Ilaa iyo maantana wuxuu ku qarwayaa saskii uu dhacdadaas ka qaaday 40 sano kahor.

Saaxiibkey Muxsin Cabdisalaam oo ila soo hadlay markii uu qoraalkan Facebook ku arkay ayaa igu yiri “Ninka uu Kacaanku sidaas u galay waa abtigey laxmi ah oo la dhashay hooyadey Fartuun Macallin Bashiir. Eebbe ha uga aargudo cadawgii sidaas u cadaabay. Abti Daahir Mirena Ilaahey ka sokow, dadkii ka danbeeyay nabada aan maanta Puntland ku ladayno ayuu ka mid yahay”