Waxay qabtaan inta ay awoodaan!

Bishii Nov, 2020 ayay abbaayo Caaisha Sabriye, iyo asxaabteeda Asma Ali Ahmed iyo Hussein Ali Hassan oo sanado badan isku fasal ahaa, sanadkii horena Dugsi Sare ka wada qalinjabiyay waxay ku fikireen in intii ay karaan ay waxbaraan dadka danyarta ah ee duruuftu u diidday waxbarashada.

Waxay tageen kaam ku yaalla Deyniile, oo qorshuhu ahaa in ay agagaarkiisa ka kireystaan qol ay carruurta kaamka wax ku baraan Khamiista iyo Jimcaha. Balse waxay ku soo arkeen xaalad nololeed oo waxbarasho uga sii daran. Waa dad aan cidna u maqneyn, ceelna u qodneyn oo aan heli karin wax ay cunaan. Waxay isla garteen in ay qorshaha waxbarashada dib u dhigaan oo ay hadda wax ka qabtaan baahida nololeed ee kaamka ka taagan.

Waxay soo qorteen dadkii ugu nuglaa oo isugu jiray cuuryaanno, indhoolayaal, waayeel gablan ah oo aan wax dhalin iyo carruur agoon ah. Waxay isku qanciyeen in aysan qarash u heli karin cunto ay danyartaas siiyaan maalin kasta, kadibna waxay u tageen qaar ka mid ah hoteellada iyo maqaayadaha Muqdisho. Waxay u sheegeen baahida jirto, waxayna ka codsadeen in ay siiyaan cuntada ka soo harta qadada, si ay dadkaas baahan ugu quudiyaan.

Maqaayadaha Xadramindi, Yaman-siciid, Nasiye Restaurant iyo Somali Hotel ayay galabkii u tagaan, waxayna ka qaadaan cuntadii aan laga iibsan ee qadada ka soo hartay. Qarash badan kama galo oo maalinkii waxaa ku baxdo $8 oo ah tirisboor iyo baarsalka cuntada loogu shubo, waxaana ka bixiyo qof ehelka ah.

Xuseen iyo Asma waxay ku mashquuleen waxbarasho dibadeed, waxaana hadda shaqada wado Caasho iyo Jamaal Sabrie. Galabta ayaan kaamka u raacay oo cunnada la soo qaybiyay, waxaana ku soo arkay carruur ku soo kala ordaysa markii ay muuqooda arkaan, oo ay wax kasta kala wayntahay in ay helaan cunno ay nafta ku ceshadaan.

Danyarta cidna uma maqna, ceelna uma qodna. Dowladdooda kaalmo ka helaan. Akhyaarey waxaan baraarujinayaa in laga warqabo oo qof kasta wixii uu awoodo ku kaalmeeyo dadka nugul ee nagu dhex nool.