Anigu hooyadey ayaan caano la iibin jiray, marna hilib ayay qali jirtay, waxaana xubnaha hilibkaas u kala gayn jiray qoysas rukun nooga qaadan jiray. Subaxa Khamiista wuxuu arday kasta macallinka dugsiga ugu geyn jirnay kun shilin. Hooyadey ayaa igu tiri “Waxaan xusuustaa in aan marmar idiin waayi jiray kunkii shilin ee aad Khamiista macallinka u geyn lahaydeen!”
Saaxiibkey Bashiir Maxamuud oo noloshiisa iiga warramaya wuxuu igu yiri “Anigu waxaan iibin jiray lows. Hooyadey waxay igu tiri “maalinkii uu aabbahaa dhintay waxaa geeridiisa iiga sii xanuun badneyd oo aan ka walwalsanaa sidii aan ku keeni lahaa quudkii aan idinku korin lahaa”
“Waagii aan yaraa waxaan iibin jiray cajiin, ciyaalka xaafadda oo igu caynaya shaqadayda ayaana iigu yeeri jiray Xasan Cajiinle ” Xasan Cabdullaahi Maalin
“Anigoo dugsi Quraan dhiganaya ayaan hooyadey huudheey Bakaaro kula gadi jiray. Marna nin gaari-dameer cidaha biyaha ugu dhaamiyo ayaan la shaqeyn jiray” Xasan Aadan Hoosow
Xasan Kaafi oo faallo ka bixiyay qoraal aan xalay Facebook soo dhigay wuxuu igu yiri “10 sano ayaan caseeye ahaa, haddana waxaan Master of Aviation Management ka wadaa jaamacadda Arusha ee dalka Tanzaaniya. Guul baan u rajaynayaa caseeyaasha dhammaantood.”
“Gaari-dameer ayaan ku shaqeyn jiray anigoo dugsi hoose dhiganaya. Sakaraadkii aabbehey ayaan ku mashquulnay, oo gaari-dameerkii waan iska gadnay. Maalinkii aabbe dhintay subixii ku xigay ayaa nin qaraabada ah igu yiri “Aabbahaa waa la soo duugay ee yaa badar ka sugee maa shaqaysatid?” Isla maalinkaas ayaana shaqo ka billaabay xoolaqalka Gubta.” Cabdirisaaq Xasan Jidhi
Wiilka curashadiisa fool ayaa ka horreyso. Dadka ugu dadnimada iyo dunta wanaagsan ee aan aqaanno waa dad duruuf iyo nolol adag ku soo koray. Waxay soo galeen halgan adag oo ay ku gaareen heerka ay maanta joogaan. Waxay ku raaxaystaan in ay ka sheekeeyaan halgankii ay soo mareen. Waana dad garasho leh oo fahmi kara duruufaha nolosha iyo dadka maanta taagan halkii ay shalay soo mareen.
Waa sheekooyin kufkuf iyo halgan ah oo mudan in qalin dahab ah lagu qoro, dadkana looga sheekeeyo.
Ustaad aniga wali ma shaqeyn hal kun oo shilin oo dhididkeyga ah. Lkn waxa aan ahay arday jaamacad dhigta sanadkii 3aad marayaa. Waliba kuliyada medicine ka illaa heerkaan waxaa isoo gaarsiiyaya hooyo iyo aabe allaha ka abaal mariyo❤. Lkn waa jeclaan lahaay inaan maalin shaqeeya. Oo qoyskeyga kaalmo u noqdo. Shaqo waa shaqo, laakin wali ma arkin shaqo waqti gaaban la shaqeenaayo 3 saac ama 4 saac maalintii haddii aad aragto igu soo xor ama talo ii reeb. Mahadsanid😍
ReplyDelete