Skip to main content

Dhiiqo ayay lugaha u gelisay!

Sanadkii hore ayay Ikraan jaamacad ka qalinjebisay, welina shaqo ma helin. Bil ka hor waxaa guursaday Daahir oo ka shaqeeyo bangi uu kaashiyeer ka yahay. Eeddadeed Ifraax oo Sweden deggan ayay guurka iyo nolosheeda kala sheekeysatay. Waxayna u sheegtay in iyada iyo ninkeeduba ay hal shirkad iskala shaqeeyaan, biilka gurigana ay isla bixiyaan, ayna kala qeybsadaan shaqada guriga.

Habeen hore markii uu Daahir fiidkii guriga soo galay ayuu indhaha ku dhuftay firsho iyo indhaxumo uusan jecleysan. Ceebteed ma aha ee waa caadadeed ayuu is yiri. Iyadoo musalsal ku daawanaysa qolka fadhiga ayuu u galay. Gacaliso ii warran? Maanta Khamiis ayay aheyd shaqada ayaa igu badneyn, daal iyo baahi ayaana tacbaan la ahay ee casho iga soo gaarsii, hooyo ayaana berri noo soo Jimceysanaysa ee ku talagal ayuu ku yiri. 

Casho ma karin, shaqada guriga kalama xigno ee orod oo kushiinka gal ee casho noo habeey ayay ku tiri. Kadibna TVgii ayay ku jeesatay. Inta jeejeestay oo madaxa xoqday ayuu ku yiri: Ilaahow balaayo qoorta ha noo gelinin. Walaaley mana kuu soo shaqayhaa, mana kuu soo karihaa? Oo adna xaad noo qabahee marka? Waayehee adugu noo soo shaqeey, anaa badarka noo karaahe, ayuu ku yiri. 

Habeen hore cunto uu maqaayad ka soo gaday ayay ku casheeyeen. Subixiina waxaa timid hooyadiis. Markii ay ka naxday firshada guriga ayay xaaqin qaadatay. Maamadu waxay is laheyd gabadha haddii ay dadnimo iyo ixtiraam ku dambeeyaan way kaa qaban doontaa xaaqinka, balse way ku fiirsatay. 

Wiilkeeda Daahir ah oo ay u cuntami waysay hooyadiis oo gurigiisa xaaqeysa ayaa xaaqinkii la qabsaday, wayna ka diidday. Gabadhii ayaa soo istaagtay. Xaaqinka ayay qabsan doontaa oo iyada ayaa guriga hagaajin doonto ayay is dhaheen. Inta wiilkii ku jeesatay ayay ku tiri: wah. Buuqa maxaa keenay? Iyada maanta ha xaaqdo, adigana berri xaaq nooh! Qolka fadhiga ayayna ku laabatay.

Habartii warkii ay maqashay ayay rumeysan waysay. Allow been ka dhig ayay is tiri. Hooyo tan naagu kaa raaci mee ee yaysan cawada kula hoyan ayay ku tiri. Galabkiina maamadii way ka tagtay. Xalay fiidkii ayuu furay gabadhii ay halka bil wada noolaayeen. Naag la furay fadhi uma yaale, xalayba guriga habarteed ayay u hoyatay. Khalaas.

Comments

Post a Comment

Fadlan wixii faallo ah halkaan iigu reeb. Mahadsanid.

Popular posts from this blog

Safarkii aan ku soo maray caalamka iyo waxyaabihii cajiibka ahaa ee aan ku soo arkay!

Nin aan dhul marin dhaayo ma laha e, balwaddeydu waa safarka iyo dalxiiska. Sidii Ibnu-Baduudah ayaan ku soo wareegay shanta qaaradood ee caalamka. Waxaan tegay magaalooyinka dunida ugu caansan, waxaana la soo noolaaday xadaaradaha kala duwan ee bulshooyinka caalamka, waana sababta igu riixeysa in aan qormadaan kugula wadaago waxyaabihii iigu cajiibsanaa ee aan soo arkay. Waxaan ka duulay Muqdisho, waxaana tegay magaalada Kigaali ee dalka Rwanda. Markii aad eegto horumarka iyo muuqaalka Kigaali, caqligaadu wuu diidayaa in ay labaatan sano ka hor ku jireen dagaalla-sokeeye, ayna saddex bil gudahood isaga dileen dad ku dhow hal milyan. Rwanda waxay tusaale nool u tahay in uu dal walba ka soo kaban karo dhibaato kaste, haddii uu helo hoggaan fiican. Waxaan booqday magaalada Al-Aqsar(Luxor) ee dalka Masar oo aheed caasimaddii Boqortooyadii Fircooniga. Magaalada waxaa weli ku dambeeya raadkii Fircooniyiinta, oo ku xusuusinaya Fircoon oo Rabbinimo sheeganaya, Nabi Muuse oo uga digaya, i...
26 comments
Read more

Banka Carafo

Waa duhur Sabti ah oo ay cadceeddu Carafo dul taagan tahay. Xujeey ka badan hal milyan iyo bar ayaa maanta taagan banka Carafo, oo 23KM dhanka bari uga beegan magaalada barakeysan ee Makka. Saakay ayay halkan u soo jarmaadeen. Daafadaha dunida ayay ka kala yimideen, si ay u gutaan tiirka 5ᵃᵃᵈ ee Arkaanta Islaamka ee Xajka. Waayeel uu sanadkan xajku ugu horreeyo oo sidaas riyadiisii ugu rumowday ayaa ku badan. Fursad dahabi ah oo marla'arag ah ayay maanta haystaan. Farxad ay la wada ilmaynayaan ayaana laga dheehan karaa wajiyadooda. Daqiiqado ka hor yay ka soo gaddoomeen Masjidka Carafo ee Namirah oo uu Sheekh Maahir Al-Muciiqili ugu jeediyay khudbada, oo loogu tarjumayay 20 luqadood, kuna tujiyay salaadaha duhurka iyo casirka oo ay soo gaabiyeen. Alle deeqsi ah oo naxariis iyo dambidhaaf badan ayay marti iyo magan u yihiin. Gacmaha ayay kor u wada taagayaan. Waji iyo qalbi khushuucsan ayay Alle ku baryayaan. Ruuxdooda iyo qalbiyadooda ayaa duceynaya inta uusan afkoodu duceynin. Wax...
Post a Comment
Read more

Halgan Miradhalay!

Waxaan ku dhashay kuna soo barbaaray magaalada Dhuusamarreeb. Waxaan ka dhashay qoys danyar ah. Anigoo 10 jir ah ayaan soo galay Muqdisho, si aan u kaalmeeyo hooyadey oo agoonnimo nagu korinaysay. Waxaan shaqo ka billaabay in aan baabuurta dhaqo. Waxaa ii xigtay in aan darawal ka noqday gaari bas ah, oo aan taksiile uga sii dallacay. Kaddibna waxaan darawal u noqday maareeyihii Warshaddii Sifeynta Batroolka.  Horraantii 1990kii ayaan go'aansaday in aan dalka ka baxo oo aan Yurub u baadigoobo nolol fiican. Waxaan tikit u jartay magaalada Moscow ee dalka Ruushka, oo aan Finland uga sii tallaabayay. Lacag oo dhan waxaan haystay intii aan tikitka ku jartay. Waxaana $50 ku iibiyay sariirtii aan ku jiifan jiray, si aan jiscin uga sii dhigto.  Waxaan ka degay Moskow oo uu qabow daran ka jiray. Dhallinyaro muqallasiin ah ayaan la kulmay. Waxaan u sheegay reerka aan ahay, waxaana ka codsaday in ay dadkeyga igu raadiyaan. Labo nin ayay ii geeyeen. Si qurux badan ayay ii soo dhoweeyeen. ...
1 comment
Read more