Goortu waa 20 sano ka hor, goobtuna waa tuulada Dac oo hoostagta degmada Ceelbuur ee gobolka Galgaduud. Sanad kasta marka la soo gaaro bisha Mowliidka waxay tuuladu laga xusi jiray dhalashadii Nabi Muxammed naxariis iyo nabadgelyo korkiisa ha ahaadaanee.
Jufooyinka dego tuulada waxay hareeraha deegaanka ku lahaayeen goobo ay saldhigtaan oo ay Mowliidka iyo munaasabadaha kale ku dhigtaan. Jufadeydu waxay maalmahaas degi jirtay Ximcadde oo ah ceelka ka muuqdo sawirka hoose oo 5KM Koofur uga beegan tuulada Dac.
Xoolo iyo cunto fara badan ayaa Ximcadde la isugu geyn jiray. Qoys kasta waxay keenayeen ari, caano, bariis iyo sokor lagu cunteeyo maalmaha halkaas la joogo. Geedaha waaweyn ee Ximcadde ayaa la waabi jiray si loo harsado, looguna hoydo seddaxda maalin ee halkaas la deggan yahay. Seddaxdaas maalin waxaa na loo fasaxi jiray dugsiyada Quraanka iyo iskuullada, taas oo noo fududeysay in aan ka dhex muuqanno Mowliidka.
Waxaan u lugeyn jirnay Ximcadde. Halkaas ayaana maalmahaas ku soo qaadan jirnay farxad iyo damaashaad aan xusuusteyda ka go'in. Raggu waxay kala lahaayeen shaqooyin ay si isxilqaan ah u qaban jireen. Qaar waxay qaabilsanaayeen in ay cuntada kariyaan, qaar waxay raaci jireen xoolihii goobta la isugu keenay, qaar ariga ayay qali jireen, qaarna waxay dooni jireen wixii tuulada looga baahdo.
Rag loo xilsaaray in ay xoolaha qalaan ayaan caawin jirnay marka ay ariga qalayaan, waxaana xeer meesha ka jira aheyd in ay beerka iyo killiyaha na siiyaan markii aan u qaqabanno neefka ay bireynayaan. Cunug kasta isaga oo beer iyo killiyo ari wato ayaan isugu tegi jirnay duleedka Ximcadde. Inta meeshaas dab ka shidanno ayaan kilyaha iyo beerka ku duban jirnay, halkaas ayaana ku wada cuni jirnay beer iyo killiyo duban oo macaan badan.
Subax iyo galab kasta Quraan ayaa meesha lagu akhrin jiray, annagoo yaryar ayaa si gaar ah na loo xurmeyn jirnay oo waxaan la safan jirnay oo Quraanka la la akhrin jirnay culimada. Culimada iyo Kutaabta badar hala siiyo inta nala dhaho ayaana halkaas si qurux badan noogula soori jiray.
Markii seddax maalin iyo seddax habeen Ximcadde la joogo oo halkaas Quraan lagu akhriyo, lagu duceysto, la isku warsado, loogana tashado aayaha reerka ayaan maalinka ugu dambeeyo Dac lagu soo laaban jiray, waxaana la isugu tegi jiray guriga adeerkey Ilkacadde.
Waxaa halkaas la isaga warsan jiray xaaladaha dadka danyarta ah iyo sida ay dadku u kala daran yihiin, waxaana xoolihii iyo badarkii Mowliidka ka soo haray la kala siin jiray dadka duruufeysan ee loo arko in ay mudan yihiin in la gacanqabto.
Sidaas ayuu Mowliidku iigu leeyahay xusuus carruurnimadeyda ku tolan oo aan maankeyga ka go'in. Mowliidku wuxuu noo ahaa munaasabad farxadeed oo dugsiyada na loo fasaxo, tolkii beled iyo baaddiyo kala jirayna ku kulmo, oo isku warsado, aayahiisa uga tashado, Quraan ku akhristo, kuna duceysto, dadka danyarta ah laga kaalmeeyo.
Allow u naxariiso oo nabadgeli Nabi Muxamad.
Waa xaqiiq
ReplyDelete