Skip to main content

Dadaalaa Xaaji Cabbaas waa gaaraa!

Duruuf adag oo halgan iyo haladeyg ku suntan ayuu soo jiiray. Tuulada Dac ayaan ku soo wada barbaarnay, dugsi hoosena ku soo wada dhigannay. Muqdisho ayuu waxbarasho u soo raadsaday. Waxbarasho yeelkeede, nolosha kale ayaa cariiri ka gashay, wuxuuna halgan adag u galay in uu meel iska soo saaro oo uu noloshiisa maareeyo. Maqaayad ayuu shaqaale ka noqday, kaddibna biibito uu isagu kushiinka ugu jiray oo uu sambuuska, burka, macshada iyo shaaha ku sameyn jiray ayuu sameystay. Wuxuu marar badan caqabad ku noqday dagaalkii Itoobiya, oo markii uu deegaan nolol ka sameystaba waxaa loo qaxayay meel kale oo ku qasbaysay halgan kale.

Markii qaxii laga soo laabtay wuxuu ka mid noqday waratada khudaarta ku iibisa suuqa Bakaara. Gelinka hore Khudaarta ayuu iibin jiray, gelinka dambena iskuul ayuu dhigan jiray. Lacag uu ganacsigiisii khudaarta ka aruursaday ayuu bajaaj ku iibsaday. Markii uu sanad bajaajtii wado ayaa waxaa xanuunsatay walaashiis oo ay noqotay in caafimaad dibadda loogu qaado, kaddibna bajaajtiisii ayuu iibiyay si dawada walaashiis loogu kabo. 

Shaqo ayuu baadigoobay, kaddibna Hotel Ramaada ayuu waardiyo ka noqday. Intii uu Ramaada joogay ayuuna jaamacad billaabay. Nin maamulka bangiga Premier ka mid ah oo ay hoteelka isku barteen ayuu ka codsaday in uu bangiga shaqo uga raadiyo. Wuxuuna bangiga ka helay shaqo waardiye ah. Habeenkii bangiga ayuu ilaalinayay, maalinkiina jaamacad ayuu dhigan jiray. Kaddibna waardiyihii waa laga bedelay oo darawal ayuu bangiga u noqday.

Halgan dheer oo waxbarasho kaddib, Khamiistii ayuu ka qalinjebiyay jaamacadda Banaadir. Maamulka sare ee Premier Bank ayaana xalay u dhigay xaflad kadis ah oo uu ku gobaadinayeen halgiisa guuleystay, uguna dallacsiiyeen xafiiska dabagalka shaqooyinka bangiga. Hambalyo saaxiib Shafici Cali Ibraahim. Eebbe nolosha adduun iyo tan aakhiraba ha kugu guuleeyo.


Comments

  1. Jirde fanah November 29, 2021 at 5:02 PM

    Ma shaa alh waa halgan iyo dedaal dheer oo miro dhal ah waxaan leeyahay hanbalyo wll inata kalena alle hagu guuleeyo

    ReplyDelete

Post a Comment

Fadlan wixii faallo ah halkaan iigu reeb. Mahadsanid.

Popular posts from this blog

Safarkii aan ku soo maray caalamka iyo waxyaabihii cajiibka ahaa ee aan ku soo arkay!

Nin aan dhul marin dhaayo ma laha e, balwaddeydu waa safarka iyo dalxiiska. Sidii Ibnu-Baduudah ayaan ku soo wareegay shanta qaaradood ee caalamka. Waxaan tegay magaalooyinka dunida ugu caansan, waxaana la soo noolaaday xadaaradaha kala duwan ee bulshooyinka caalamka, waana sababta igu riixeysa in aan qormadaan kugula wadaago waxyaabihii iigu cajiibsanaa ee aan soo arkay. Waxaan ka duulay Muqdisho, waxaana tegay magaalada Kigaali ee dalka Rwanda. Markii aad eegto horumarka iyo muuqaalka Kigaali, caqligaadu wuu diidayaa in ay labaatan sano ka hor ku jireen dagaalla-sokeeye, ayna saddex bil gudahood isaga dileen dad ku dhow hal milyan. Rwanda waxay tusaale nool u tahay in uu dal walba ka soo kaban karo dhibaato kaste, haddii uu helo hoggaan fiican. Waxaan booqday magaalada Al-Aqsar(Luxor) ee dalka Masar oo aheed caasimaddii Boqortooyadii Fircooniga. Magaalada waxaa weli ku dambeeya raadkii Fircooniyiinta, oo ku xusuusinaya Fircoon oo Rabbinimo sheeganaya, Nabi Muuse oo uga digaya, i...
26 comments
Read more

Banka Carafo

Waa duhur Sabti ah oo ay cadceeddu Carafo dul taagan tahay. Xujeey ka badan hal milyan iyo bar ayaa maanta taagan banka Carafo, oo 23KM dhanka bari uga beegan magaalada barakeysan ee Makka. Saakay ayay halkan u soo jarmaadeen. Daafadaha dunida ayay ka kala yimideen, si ay u gutaan tiirka 5ᵃᵃᵈ ee Arkaanta Islaamka ee Xajka. Waayeel uu sanadkan xajku ugu horreeyo oo sidaas riyadiisii ugu rumowday ayaa ku badan. Fursad dahabi ah oo marla'arag ah ayay maanta haystaan. Farxad ay la wada ilmaynayaan ayaana laga dheehan karaa wajiyadooda. Daqiiqado ka hor yay ka soo gaddoomeen Masjidka Carafo ee Namirah oo uu Sheekh Maahir Al-Muciiqili ugu jeediyay khudbada, oo loogu tarjumayay 20 luqadood, kuna tujiyay salaadaha duhurka iyo casirka oo ay soo gaabiyeen. Alle deeqsi ah oo naxariis iyo dambidhaaf badan ayay marti iyo magan u yihiin. Gacmaha ayay kor u wada taagayaan. Waji iyo qalbi khushuucsan ayay Alle ku baryayaan. Ruuxdooda iyo qalbiyadooda ayaa duceynaya inta uusan afkoodu duceynin. Wax...
Post a Comment
Read more

Halgan Miradhalay!

Waxaan ku dhashay kuna soo barbaaray magaalada Dhuusamarreeb. Waxaan ka dhashay qoys danyar ah. Anigoo 10 jir ah ayaan soo galay Muqdisho, si aan u kaalmeeyo hooyadey oo agoonnimo nagu korinaysay. Waxaan shaqo ka billaabay in aan baabuurta dhaqo. Waxaa ii xigtay in aan darawal ka noqday gaari bas ah, oo aan taksiile uga sii dallacay. Kaddibna waxaan darawal u noqday maareeyihii Warshaddii Sifeynta Batroolka.  Horraantii 1990kii ayaan go'aansaday in aan dalka ka baxo oo aan Yurub u baadigoobo nolol fiican. Waxaan tikit u jartay magaalada Moscow ee dalka Ruushka, oo aan Finland uga sii tallaabayay. Lacag oo dhan waxaan haystay intii aan tikitka ku jartay. Waxaana $50 ku iibiyay sariirtii aan ku jiifan jiray, si aan jiscin uga sii dhigto.  Waxaan ka degay Moskow oo uu qabow daran ka jiray. Dhallinyaro muqallasiin ah ayaan la kulmay. Waxaan u sheegay reerka aan ahay, waxaana ka codsaday in ay dadkeyga igu raadiyaan. Labo nin ayay ii geeyeen. Si qurux badan ayay ii soo dhoweeyeen. ...
1 comment
Read more