Soomaaliyey dadkiinna kala barta!

God mugdi ah ayuu iftiin ka dhex arkay. Soomaaliya oo holcaysa oo qof kasta oo awoodi karay uu naftiisa iyo xoolihiisa kala cararay ayuu doortay in uu naftiisa iyo hantidiisa ku biimeeyo. Magaalo furin dagaal ah oo ay ka jirtay sabab kasta oo ku dhiirrigelin kartay in uu ka cararo ayuu ku dhiirraday in uu ku noolaado, oo ganacsina ka dhex abuuro. Jid qodxo badan ayuu qaaday. Halgan dheer oo ugu dambeyn miradhalay ayuuna ku gaaray heerka uu maanta joogo.

Wuxuu dalka ka hirgeliyay shirkadda Soomaaliya ugu weyn ee maanta loo shaqatago. Kumanaan qoys ayaa ku tiirsan oo laga biilaa ganacsiyadii u soo harjaday; Soomaali oo dhan ayaana ku tiirsan adeegyada ay bixiyaan. Horumarka dalka iyo shaqa-abuurka dadka ayuuna gacan weyn ka gaystay.

Hey'ad shirkaddiisa u qaabilsan samafalka iyo taakuleynta dadkeeda ayuu sameeyay. Markii ay dhibaato dhacdo sida abaar iyo fatahaad, shirkaddiisu waa tan koowaad ee dadkeeda u gurmata. Markii uu dalka ka dillaacay Coronavirus, waxay isu xilqaantay badbaadinta nolosha dadkeeda, waxayna isbitaallada u soo iibisay haamo oksijiin. Markii dambena waxay dalka keentay warshad soo saarta okjisiinka. 

Mar kasta oo meel dab ka kaco, shirkaddiisu waxay isu xilqaantaa deminta dabka iyo badbaadinta hantida dadka. Dabdamis kaliyana uguma sintee, waxay gacanqabataa dadkii dabkaas ku xoolobeelay, oo bilo ka hor ayayba deeq siisay dadkii ku hantibeelay dabkii ka kacay isgoyska Banaadir.

Wuxuu dhisay xarumo agoonta lagu daryeelo. Wuxuu higeliyay iskuul si bilaash ah wax loogu baro dadka indhoolayaasha ah. Ramadaan kasta waxay afuriyaan kumanaan qoys oo danyar ah. Waxay dhiirrigeliyaan waxbarashada, diini iyo maaddiba. Soonqaad walba waxay taabbageliyaan tartanka xifdinta Quraanka oo lagu tartansiiyo carruur ka kala timid gobollada dalka. Sanad kastana waxay deeq waxbarasho siiyaan bololaal arday oo ay tartan ku kala saaraan.

Sanado ka hor waxaan duleedka tareedisho ku arkay xarun agoonta lagu xannaaneeyo oo uu aabbihiis u waqfay. Ciiddana waxaa Muqdisho laga daahfurayaa Masjid uu aabbihiis u waqfay. Dad dhaliilaya oo leh Masjid wax ka daran ayaa jira ayaan arkay. Gari Alley taqaane, Masjidkan canshuur dadweyne oo dadka ka wada dhaxeysa kalum dhisin ee jaabkiisa ayuu ka bixiyay. Dadkiisana ma dayicin ee mashaariic horumarin iyo samafal ah oo ay dad badan ku nacfiyeen ayuu dalka ka hirgeliyay. Inta aan ogahayna, shirkaddiisu waa tan kaliya ee leh hey'ad samafal oo taakuleysa dadka danyarta ah. Dabcan dad badan ayaa ganacsiyada shirko kula ah, balse isaga ayaan ku halqabsaday maadaama uu fikirka iyo hirgelintiisa hormuud u ahaa. 

Ma aqaan qof Soomaaliya u qabtay inta uu isagu u galay. Howlo dowladdu gabtay ayuu u istaagay. Arxan iyo damqasho aanan ganacsatada kale laga helin ayaana Alle ku deeqay. Abaal aan duugoobeyn oo aanan ogeyn goorta loo gudi doono ayuuna dadkiisa iyo dalkiisa gashaday. 

‘Soomaaliyey dadkiinna kala barta’ waa kii Madaxweyne Aadan Cadde yiriye, Axmed Nuur Cali Jimcaale waa ganacsade iyo samafale Ilaahey dadkiisa iyo dalkiisa ku anfacay, oo bogaadin iyo kudayasho mudan. Wuxuu astaan iyo tusaale nool u yahay hal-abuurka, halganka, adkeysiga, ammaanada, iskutashiga, garashada iyo waxquurka. Ixtiraam iyo qaddarin badan ayaan u hayaa. Eebbe cimrigiisa iyo xoolihiisa ha u barakeeyo.