Skip to main content

Halgan hirgalay

Magaalada Rabdhuurre ee gobolka Bakool ayuu ku dhashay. Isaga oo 5 sano jir ah ayaa waxaa naafeeyay xanuunka dabeysha. Rabdhuurre ayuu ka soo dhigtay dugsiga Qur’aanka iyo dugsiga hoose. Kaddibna wuxuu u soo wareegay Muqdisho oo uu waxbarashadii ka sii watay.

2010kii ayuu ka qalinjebiyay iskuulka Khadiija bintu Khuweylid ee degmada Dharkenley. Balse duruufta dhaqaale ayaa u diidday in uu Jaamacad dhigto.

“2017kii aniga oo ay mootadu iiga halleysan tahay agagaarka Digeer ayaa waxaa i arkay Axmed Sawaaj. Wuu ila sheekeystay, kaddibna wuxuu maalinkii xigtay iga duubay muuqaal aan uga hadlayo nolosheyda iyo hakadka ku yimid waxbarashadayda. Maalin kaddib waxaa ila soo xiriiray ustaad Shaafici Diiriye oo ka mid ah maamulka Jaamacadda SIU. Shaafici wuxuu ii sheegay in uu maamulka hordhigay xaaladdeyda, ayna i siiyeen deeq waxbarasho. Maalinkii ku xigtay ayaan Jaamacadda tegay, waxaana iska diiwaangeliyay kulliyadda Kumbiyuutarka. 


Degmada Kaxda ayaan degganahay. Xarunta Jaamacadda ee Warshadaha ayaana subax kasta iman jiray. 5 maalin ayaan asbuucii Jaamacadda dhiganayay. Khamiista iyo Jimcahana waxaan ka shaqeynayay xafiiska Maaliyadda ee Jaamacadda oo aan shaaheyga ka heli jiray. Waxayna sidoo kale Jaamacaddu meel ii saartay shidaalka mootadayda.”

Sidaas waxaa yiri Aadan Ibraahim Aadan oo maanta ka qalinjebiyay Jaamacadda SIU. Xalfladdana uga hadlay magaca ardayda qalinjebineysa. Halgankii waxbarasho ee uu soo galay, caqabadihii qabsaday iyo sidii uu uga soo gudbay ayuu si dareen ah uga sheekeeyay.

Nasiib wanaag, mid ka mid ah maamulka Dahabshiil Group oo madasha ka hadlay ayaa ballanqaaday in Dahabshiil Group ay shaqo siinayso Aadan Ibraahim. 

Hambalyo walaalkey Adan Ibrahim Adan. Adduun iyo aakhiraba waxaan u rajeynayaa nolol fiican iyo mustaqbal ifaya oo aad mahdiso, Alle idankiis.



Comments

Post a Comment

Fadlan wixii faallo ah halkaan iigu reeb. Mahadsanid.

Popular posts from this blog

Safarkii aan ku soo maray caalamka iyo waxyaabihii cajiibka ahaa ee aan ku soo arkay!

Nin aan dhul marin dhaayo ma laha e, balwaddeydu waa safarka iyo dalxiiska. Sidii Ibnu-Baduudah ayaan ku soo wareegay shanta qaaradood ee caalamka. Waxaan tegay magaalooyinka dunida ugu caansan, waxaana la soo noolaaday xadaaradaha kala duwan ee bulshooyinka caalamka, waana sababta igu riixeysa in aan qormadaan kugula wadaago waxyaabihii iigu cajiibsanaa ee aan soo arkay. Waxaan ka duulay Muqdisho, waxaana tegay magaalada Kigaali ee dalka Rwanda. Markii aad eegto horumarka iyo muuqaalka Kigaali, caqligaadu wuu diidayaa in ay labaatan sano ka hor ku jireen dagaalla-sokeeye, ayna saddex bil gudahood isaga dileen dad ku dhow hal milyan. Rwanda waxay tusaale nool u tahay in uu dal walba ka soo kaban karo dhibaato kaste, haddii uu helo hoggaan fiican. Waxaan booqday magaalada Al-Aqsar(Luxor) ee dalka Masar oo aheed caasimaddii Boqortooyadii Fircooniga. Magaalada waxaa weli ku dambeeya raadkii Fircooniyiinta, oo ku xusuusinaya Fircoon oo Rabbinimo sheeganaya, Nabi Muuse oo uga digaya, i...
26 comments
Read more

Banka Carafo

Waa duhur Sabti ah oo ay cadceeddu Carafo dul taagan tahay. Xujeey ka badan hal milyan iyo bar ayaa maanta taagan banka Carafo, oo 23KM dhanka bari uga beegan magaalada barakeysan ee Makka. Saakay ayay halkan u soo jarmaadeen. Daafadaha dunida ayay ka kala yimideen, si ay u gutaan tiirka 5ᵃᵃᵈ ee Arkaanta Islaamka ee Xajka. Waayeel uu sanadkan xajku ugu horreeyo oo sidaas riyadiisii ugu rumowday ayaa ku badan. Fursad dahabi ah oo marla'arag ah ayay maanta haystaan. Farxad ay la wada ilmaynayaan ayaana laga dheehan karaa wajiyadooda. Daqiiqado ka hor yay ka soo gaddoomeen Masjidka Carafo ee Namirah oo uu Sheekh Maahir Al-Muciiqili ugu jeediyay khudbada, oo loogu tarjumayay 20 luqadood, kuna tujiyay salaadaha duhurka iyo casirka oo ay soo gaabiyeen. Alle deeqsi ah oo naxariis iyo dambidhaaf badan ayay marti iyo magan u yihiin. Gacmaha ayay kor u wada taagayaan. Waji iyo qalbi khushuucsan ayay Alle ku baryayaan. Ruuxdooda iyo qalbiyadooda ayaa duceynaya inta uusan afkoodu duceynin. Wax...
Post a Comment
Read more

Farriin ku socoto ardayda ka baxeysa dugsiga sare

Marka hore waxaan kuugu hambalyeynayaa safarka waxbarashada iskuulka ee maanta kuu soo idlaaday, waxaana kaaga rajeynayaa in aad ku guuleysato. Si ka duwan safarrada kale, safarka waxbarashadu wuxuu mar kasta ka billawdaa dhammaadka. Faanoole fari kama qodna e, waxaa hadda kuu billaabanaya safar kale oo kaa dalbanaya halgan iyo dadaal badan. Waa safar go'aamin doona qofka aad noqon doonto, nolosha aad mustaqbalkaada ku qaadan doonto iyo kaalinta aad bulshada ku dhex lahaan doonto. Si safarkaasi u guuleysto, waxaan kula gudboon in aad barato naftaada iyo waxa ay ku fiican tahay, kadibna aad xulato takhasus kugu habboon oo aad jeceshahay, aadna leedahay shakhsiyadda iyo kartida uu dalbanayo, suuqana ku leh fursad fiican. Tobaneeye sano kahor oo dalku burbursanaa, dadkuna dhiigbaxayay waxaan baahi badan u qabnay dad xaaladdaas la falgala, waana sababta ay ardaydeennu u barteen caafimaad iyo Injineerin, waayo waxaan u baahneyn dhaqtar dadka daweeya, iyo injineer dalka noo dhisa. Nas...
3 comments
Read more